މިނިސްޓަރު ސައީދާ ދެކޮޅަށް ހުށަހެޅި އިތުބާރު ނެތް ކަމުގެ މައްސަލަ ފެއިލްވެއްޖެ

އިޤްތިޞާދީ ތަރައްޤީ، ޓްރާންސްޕޯޓާއި ވިޔަފާރީގެ މިނިސްޓަރު މުޙައްމަދު ސައީދުގެ އިތުބާރު ނެތް ކަމަށް އެމްޑީޕީން ރައްޔިތުންގެ މަޖިލީހަށް ހުށަހެޅި މައްސަލަ މިއަދު ނެގި ވޯޓުން ބޭރުކޮށްލައިފިއެވެ.

މިނިސްޓަރު ވަކިކުރުމާ ދެކޮޅަށް 54 މެންބަރުން ވޯޓު ދެއްވިއިރު، ވަކިކުރުމަށް ތާއީދުކުރެއްވީ 10 މެންބަރުންނެވެ.

އެމްޑީޕީގެ 13 މެންބަރުން ސޮއިކޮށް މި މައްސަލަ ހުށަހެޅީ އޮގަސްޓް މަހުއެވެ. މައްސަލައިގައި މިނިސްޓަރާ ދެކޮޅަށް ހަ ތުހުމަތެއް ކޮށްފައިވެއެވެ. އޭގެ ތެރޭގައި ޑޮލަރުގެ ކަޅު ބާޒާރުގެ ރޭޓު މައްޗަށް ދިޔުމާއި، ސަރުކާރުން އިޢުލާންކުރި ބޮޑެތި ޕްރޮޖެކްޓްތައް ހުއްޓިފައި އޮތުމާއި، ސްޕެޝަލް އިކޮނޮމިކް ޒޯން ޤާނޫނަށް ގެނައި ބަދަލުތަކުގެ ސަބަބުން ޤައުމުގެ ސިޔާދަތަށް ނުރައްކާވާ ކަމަށް ބުނާ ތުހުމަތު ހިމެނެއެވެ. އޭގެ އިތުރުން މަޖިލީހަށް ޖަވާބުދާރީ ނުވެވަޑައިގަތުމާއި، ވިޔަފާރިތައް ރައްކާތެރި ނުކުރެއްވުމާއި، ދައުލަތުގެ މުދަލާއި ފައިސާ ބެލެހެއްޓެވުމުގައި ފަރުވާކުޑަ ކުރެއްވި ކަމަށް ވެސް ތުހުމަތުކޮށްފައިވެއެވެ.

މިހާރުގެ މަޖިލީހުގައި ސަރުކާރު ހިންގާ ޕީއެންސީއަށް ބޮޑު އަޣުލަބިއްޔަތެއް އޮތް އިރު، އެމްޑީޕީގެ ޖުމްލަ މެންބަރުންގެ ޢަދަދަކީ 13 އެވެ. މިނިސްޓަރު ސައީދަކީ ރައީސް ޢަބްދުﷲ ޔާމީނުގެ ދައުރުގައި ވެސް އިޤްތިޞާދީ މިނިސްޓަރުކަން ކުރައްވާފައިވާ ބޭފުޅެކެވެ. 2023 ވަނަ އަހަރު ރައީސް ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގަތުމާ އެކު އެ މަނިކުފާނު ސައީދު އެ މަޤާމަށް އަލުން ޢައްޔަންކުރެއްވިއެވެ.