ރަސްމާލެ މަޝްރޫޢާ ގުޅޭ ކަންބޮޑުވުންތަކުގެ ތެރެއިން ޢިލްމުވެރިންގެ ގުޅުމުގެ ރައީސް އިސްތިއުފާދީފި

ރަސްމާލެ މަޝްރޫޢާ ބެހޭގޮތުން ކަންބޮޑުވުންތައް ފާޅުކުރަމުން އަންނަ ދީނީ ޢިލްމުވެރިންގެ ހަރަކާތެއް ކަމަށްވާ ޢިލްމުވެރިންގެ ގުޅުމުގެ ރައީސް ދެތިން ދުވަސް ކުރިން އެ މަގާމުން އިސްތިއުފާދީފައިވާ ކަމަށް އެ ހަރަކާތުން ޔަގީންކޮށްދީފިއެވެ.

އިސްތިއުފާދީފައިވަނީ ޢިލްމުވެރިންގެ ގުޅުމުގެ ރައީސްގެ މަގާމުގައި ހުރި އައްޝައިޚް މުޙައްމަދު ހަލީމެވެ. އޭނާ އެ މަގާމުން ވަކިވީ ރަސްމާލެ މަޝްރޫޢާ ގުޅިގެން އެ ހަރަކާތުގެ ބައެއް ޢިލްމުވެރިން ވަރަށް ބޮޑަށް ކަންބޮޑުވުން ފާޅުކުރަމުން އަންނަ ދުވަސްވަރެއްގައެވެ.

ހަލީމަކީ ޖަމްޢިއްޔަތުއްސަލަފުގެ މެންބަރެއް ކަމުގައިވާއިރު، އޭނާއަކީ އެ ޖަމްޢިއްޔާގެ ޢިލްމުވެރިންގެ މަޖިލީހުގެ މެންބަރެކެވެ. ރައީސްކަމުން އިސްތިއުފާދިން ނަމަވެސް އޭނާ ޢިލްމުވެރިންގެ ގުޅުމުން ވަކިވެފައެއް ނުވެއެވެ.

ހަލީމް އިސްތިއުފާދިނުމާއެކު، ސަލަފުގެ ތިން އިސް ބޭފުޅަކު ވަނީ ޢިލްމުވެރިންގެ ގުޅުމުން ވަކިވެފައެވެ. އެއީ ސަލަފުގެ ރައީސް ޢަބްދުﷲ މުޙައްމަދާއި، އެ ޖަމްޢިއްޔާގެ ކުރީގެ ނާއިބު ރައީސް އަދި މިހާރުގެ ތަރުޖަމާން އައްޝައިޚް ޙަސަން މޫސާ ފިކުރީއާއި، ސަލަފުގެ ޢިލްމުވެރިންގެ މަޖިލީހުގެ މެންބަރު ޑރ. ޢަލީ ޒާހިރެވެ.

ޢިލްމުވެރިންގެ ގުޅުމުގެ ސެކްރެޓަރީ ޖެނެރަލް އައްޝައިޚް ޒަމްޒަމް ފާރިސް ވަނީ ރަސްމާލެ މަޝްރޫޢުގައި ހުރި ކަންބޮޑުވުންތަކާ ގުޅޭ އެކި މަޢުލޫމާތު ވަރަށް ތަފްސީލުކޮށް ހިއްސާކުރަމުންނެވެ. އެހެންކަމުން ސަރުކާރަށް ނިސްބަތްވާ އެކްޓިވިސްޓުންނާއި ބައެއް ޢިލްމުވެރިންގެ ފާޑުކިޔުން ވަނީ އޭނާއަށް އަމާޒުވެފައެވެ.