ލުބުނާނުގެ ރައީސް ޔޫއޭއީއަށް ޝުކުރު އަދާކުރައްވައި ގަލްފަށް ދެވޭ ހަމަލާތައް ކުށްވެރިކުރައްވައިފި

ލުބުނާނުގެ ރައީސް ޖޯސެފް ޢައުން ޔޫއޭއީން ލުބުނާނަށް ދެމުން ގެންދާ އެހީތެރިކަމަށް ޝުކުރު އަދާކުރައްވައި ގަލްފުގެ ޤައުމުތަކަށް އަމާޒުވާ ހަމަލާތައް ހަރުކަށި ޢިބާރާތުން ކުށްވެރިކުރައްވައިފިއެވެ.

ޔޫއޭއީގެ ފެޑެރަލް ނެޝަނަލް ކައުންސިލްގެ ރައީސް ސަޤުރު ޣޮބާޝްއާ ބައްދަލުކުރައްވައި ޢައުން ވިދާޅުވީ "ހުރިހާ ދާއިރާއަކުން" ޔޫއޭއީން ފޯރުކޮށްދޭ އެއްބާރުލުމަށް ޝުކުރުވެރިވެވަޑައިގަންނަވާ ކަމަށެވެ.

އެ ހަމަލާތައް ދެމިގެންދާނަމަ "ގަލްފުގެ ޤައުމުތަކާއި މުޅި ސަރަޙައްދުގެ ސަލާމަތާއި ހަމަޖެހުމަށް" ނުރައްކާވާނެ ކަމަށްވެސް އެމަނިކުފާނު ވިދާޅުވިއެވެ.

ލުބުނާނަށް ދަތުރުކުރެވޭ ގޮތަށް ޔޫއޭއީން ދާދި ފަހުން ނިންމި ނިންމުމަށް އެމަނިކުފާނު މަރުޙަބާ ވިދާޅުވިއެވެ. އެ ނިންމުމަކީ ދެ ޤައުމާއި ދެ ޤައުމުގެ ރައްޔިތުންގެ ދެމެދުގައި އޮތް "އަޚުވަންތަ ގުޅުންތަކުގެ ފުންމިން" ރަމްޒުކޮށްދޭ ކަމެއް ކަމަށް ޢައުން ސިފަކުރެއްވި ކަމަށް ލުބުނާނުގެ ރިޔާސީ ގަނޑުވަރުން އެކްސްގައި ޝާއިޢުކުރި ބަޔާނުގައި ބުނެފައިވެއެވެ.

މި ބައްދަލުވުމުން ދައްކުވައިދެނީ ދެ ޤައުމުގެ ދެމެދުގައި ގުޅުން އިތުރަށް ބަދަހިކުރުމުގެ ޝައުޤުވެރިކަން ދެ ފަރާތުގައިވެސް އޮތް މިންވަރެވެ.