ފަސްޓް ލޭޑީ ސާޖިދާ ޕާކިސްތާނުގެ ފަސްޓް ލޭޑީ އާސިފާއާ ބައްދަލުކޮށް އަންހެނުންގެ ޞިއްޙަތާ ބެހޭ ގޮތުން މަޝްވަރާކޮށްފި

ފަސްޓް ލޭޑީ ސާޖިދާ މުޙައްމަދު، ޕާކިސްތާނުގެ ރައީސްގެ ރަސްމީ ގެކޮޅުގައި އެ ޤައުމުގެ ފަސްޓް ލޭޑީ އާސިފާ ބުޓޯ ޒަރްދާރީއާ ބައްދަލުކުރައްވައި، އަންހެނުންގެ ޞިއްޙަތާއި ތަޢުލީމުގެ ދާއިރާތަކުގައި ގުޅިގެން މަސައްކަތްކުރުމާ ބެހޭ ގޮތުން މަޝްވަރާކުރައްވައިފިއެވެ.

އާސިފާއަކީ ޕާކިސްތާނުގެ ނޭޝަނަލް އެސެމްބްލީގެ މެމްބަރެކެވެ. ބައްދަލުވުމުގައި އޭނާ ފަސްޓް ލޭޑީ ސާޖިދާއަށް މަރުޙަބާ ބުނެ، ފައިދާހުރި ވާހަކަތަކެއް ދެއްކުމުގެ ފުރުޞަތު ލިބުމުން އުފާވާ ކަމަށް ބުންޏެވެ.

ފަސްޓް ލޭޑީ ސާޖިދާ، ދިވެހި ވަފުދަށް ދެއްކި ހޫނު މެހުމާންދާރީއަށް ޝުކުރު އަދާކުރެއްވިއެވެ. އަދި ޢާންމު ޞިއްޙަތުގެ ދާއިރާގައި، ޚާއްޞަކޮށް އަންހެނުންގެ ޞިއްޙަތާ ބެހޭ ހޭލުންތެރިކަން އިތުރުކުރުމަށް އާސިފާ ކުރަމުންދާ މަސައްކަތްތަކަށް ފަސްޓް ލޭޑީ ތައުރީފުކުރެއްވިއެވެ.

ދެ ފަސްޓް ލޭޑީން ކުރެއްވި މަޝްވަރާތަކުގައި ތަޢުލީމު ކުރިއެރުވުމާއި، ޞިއްޙީ ޚިދުމަތް ފޯރުކޮށްދިނުމާއި، މުޖުތަމަޢުގެ ދުޅަހެޔޮކަމާ ބެހޭ ވާހަކަ ދެކެވުނެވެ. ބަލިތަކުން ރައްކާތެރިވުމުގެ ޕްރޮގްރާމްތަކުގައި، ޚާއްޞަކޮށް ގައިންގަޔަށް ނާރާ ބަލިތަކާއި ދުޅަހެޔޮ ދިރިއުޅުން ހިތްވަރުކޮށްދިނުމުގައި ގުޅިގެން މަސައްކަތްކުރެވޭނެ ގޮތްތަކަށް ވެސް ބައްދަލުވުމުގައި ވިސްނާލެވުނެވެ.

އަންހެނުންނާއި އަންހެން ކުދިންގެ ޙައްޤުތަކާއި ބާރުވެރިކަމަށް ތާއީދުކުރުމުގައި ފަސްޓް ލޭޑީންނަށް އަދާކުރެވޭ ދައުރު މުހިންމުކަން ވެސް ފާހަގަކުރެވުނެވެ. ތަޢުލީމާއި، އިޤްތިޞާދީ ބައިވެރިވުމާއި، އިޖްތިމާޢީ ރައްކާތެރިކަމުގެ ދާއިރާތަކުގައި ހުރި ހުރަސްތައް ނައްތާލުމާއި، އަންހެނުންނަށް ލީޑަރޝިޕްގެ މަޤާމުތަކަށް އަރައި އެ މަޤާމުތަކުގައި ދެމިހުރުމުގެ ފުރުޞަތު ފުޅާކުރުމަށް ދެ ފަރާތުން ބާރުއެޅިއެވެ.

ބައްދަލުވުން ނިމުނީ، ހިއްސާވާ ތަރުޖީޙުތަކުގައި ގާތުން ގުޅިގެން މަސައްކަތްކުރުމާއި ނާޒުކު ހާލަތުގައިވާ މުޖުތަމަޢުތައް ކުރިއެރުވުމުގެ ޢަހުދު ދެ ފަސްޓް ލޭޑީން އަލުން ތަކުރާރުކޮށްގެންނެވެ.