ދިވެހީންގެ އުފެއްދުންތެރިކަމުގެ މައުރަޒު 4،404 އުފެއްދުމާއެކު ރޭ ހުޅުމާލޭގައި ހުޅުވާލާފި

ރާއްޖޭގައި ބާއްވާ އެންމެ ބޮޑު މައުރަޒު ކަމަށްވާ "ދިވެހީންގެ އުފެއްދުންތެރިކަމުގެ މައުރަޒު 2026"، 4,404 އުފެއްދުމާއެކު ރޭ ހުޅުމާލެ ސެންޓްރަލް ޕާކުގައި ހުޅުވައިފިއެވެ.

ސެންޓްރަލް ޕާކުގެ ބޮޑު ސަރަހައްދެއް އެ މައުރަޒަށް ޚާއްޞަކޮށްފައިވެއެވެ. މައުރަޒު ކުރިއަށްދާނީ ރޭން ފެށިގެން އަންނަ މަހުގެ 2 ވަނަ ދުވަހާ ހަމައަށް، ނުވަ ދުވަހުގެ މުއްދަތަކަށެވެ.

މިއަހަރުގެ މައުރަޒުގައި ބައިވެރިވުމަށް 780 ފަރާތަކުން ރަޖިސްޓްރީވެފައިވެއެވެ. އޭގެ ތެރެއިން 419 ފަރާތަކުން 4,404 އުފެއްދުން ހުށަހަޅާފައިވާއިރު، މިއީ 2025 ވަނަ އަހަރާ އަޅާބަލާއިރު %83.5 ގެ އިތުރުވުމެކެވެ. ޖުމްލަ އުފެއްދުންތަކުގެ ހަތަރުބައިކުޅަ ތިންބައި ހިއްސާކުރަނީ އަމިއްލަ ފަރުދުންނެވެ. އޭގެ އިތުރުން ވިޔަފާރިތަކާއި، ނުކުޅެދުންތެރިކަން ހުންނަ ފަރާތްތަކާއި، ތައުލީމީ މަރުކަޒުތަކާއި ކުންފުނިތަކުން ވެސް ބައިވެރިވެފައިވެއެވެ.

މައުރަޒުގައި 16 ދާއިރާއަކުން 73 ގިންތިއެއް ހިމެނެއެވެ. އެންމެ ގިނަ އުފެއްދުން ހުށަހަޅާފައިވަނީ ދިވެހިންގެ ޒަމާންވީ ސަގާފަތާ ގުޅުންހުރި އަތްތެރި މަސައްކަތުގެ ދާއިރާއިން ކަމަށްވާއިރު، އެއީ 1,695 އުފެއްދުމެވެ. ދެވަނައަށް އެންމެ ގިނައީ ކްރިއޭޓިވް އާޓްސް އަދި ޑިޒައިނިންގ ދާއިރާގެ 920 އުފެއްދުމެވެ. ކާބޯތަކެތި، ފެޝަން، އައިސީޓީ، އަދަބިއްޔާތު، މަސްވެރިކަމާއި އިޔާދަކުރަނިވި ހަކަތައިގެ ދާއިރާތަކުން ވެސް އުފެއްދުން ހިމެނެއެވެ.

މައުރަޒުގެ ވާދަވެރި ބަޔުން ޖުމްލަ 298 އެވޯޑެއް ދީފައިވެއެވެ. އޭގެ ތެރޭގައި އެކި ދާއިރާތަކުން ފުރަތަމަ، ދެވަނަ އަދި ތިންވަނަ ހޯދި ފަރާތްތަކާއި، މައުރަޒުގެ އެންމެ މަތީ ޝަރަފު ކަމަށްވާ "ރަން 5 ވަނަ" ހިމެނެއެވެ. ވަނަތައް ހޯދީ 134 ބައިވެރިއަކުވާއިރު، ޚާއްޞަ އެހީއަށް ބޭނުންވާ ފަރާތްތަކުގެ ކެޓަގަރީން 14 ބައިވެރިއަކު 76 އެވޯޑު ހޯދާފައިވެއެވެ.

މައުރަޒު ބާއްވަނީ ހަތް ޑިސްޓްރިކްޓަކަށް ބަހާލައިގެންނެވެ. އޭގެ ތެރޭގައި ކްރިއޭޓިވް އިކޮނޮމީ، ޑިޖިޓަލް އެންޑް އިނޮވޭޓިވް، މާކެޓްޕްލޭސް އަދި ރަށު ފަތުރުވެރިކަމަށް ޚާއްޞަކޮށް އަލަށް ތަޢާރަފްކުރި ވިޒިޓަރ އިކޮނޮމީ ޑިސްޓްރިކްޓް ހިމެނެއެވެ.

↩️ Reply to this message with a corrected version to replace the draft.