ގއ. އަތޮޅު ކަނޑުތެރޭގައި ދަގަނޑު ބޮއެއް އޮޔާދާތީ ދަތުރުވެރިން ސަމާލުވާން އެދެފި

ގއ. އަތޮޅު ދިގުވަރު ކަނޑު އެތެރެ ވަރީގައި ދަގަނޑު ބޮއެއް އޮޔާދާ ކަމަށް ފާހަގަވެ، ކަނޑު ދަތުރުކުރާ ފަރާތްތައް ސަމާލުވުމަށް އެމްއެންޑީއެފުން އިލްތިމާސްކޮށްފިއެވެ.

އެ އިދާރާއިން ބުނީ އޮޔާދަނީ ފަސް ފޫޓު ދިގު، ފަސް ފޫޓު ފުޅާ ދަގަނޑު ބޮއެއް ކަމަށެވެ. މިއަދު ހެނދުނު 11:50 ހާއިރު އެ ބޮއި ފެނިފައިވަނީ ގއ. އަތޮޅު ދިގުވަރު ކަނޑު އެތެރެ ވަރީ ކަނޑުތެރެއިން ކަމަށް އެމްއެންޑީއެފުން ބުނެފައިވެއެވެ.

އެ ބޮއި ދެކުނުން އުތުރަށް ދަތުރުކުރަމުންދާ ކަމަށާއި، މިރޭގެ ވަގުތެއްގައި ގއ. ވިލިނގިލި، ގއ. މާމެންދޫ، ގއ. ނިލަންދޫ އަދި ގއ. ދާންދޫ ސަރަހައްދުގައި އެ ބޮއި އޮތުން އެކަށީގެންވާ ކަމަށް ވެސް އެމްއެންޑީއެފުން ބުނެފައިވެއެވެ.

އެހެންކަމުން ކަނޑުމަގުން ދަތުރުކުރާ އެންމެހައި އުޅަނދުފަހަރު ސަލާމަތާއި ރައްކާތެރިކަމަށް ބަލައިގެން ދަތުރުކުރުމަށް އެ އިދާރާއިން ވަނީ އިލްތިމާސްކޮށްފައެވެ.