ޓެކްސް އެޕީލް ޓްރިބިއުނަލްގެ މާލީ މުޢާމަލާތްތައް ޤަވާއިދާ އެއްގޮތް: އޮޑިޓް ރިޕޯޓް

ޓެކްސް އެޕީލް ޓްރިބިއުނަލުން މިދިޔަ އަހަރު ހަރަދުތައް ކޮށްފައި ހުރީ ދައުލަތުގެ މާލިއްޔަތު ޤަވާއިދާ އެއްގޮތަށް ކަމަށް އޮޑިޓަރ ޖެނެރަލް ނެރުއްވި އޮޑިޓް ރިޕޯޓުގައި ބުނެފިއެވެ.

އެ ރިޕޯޓުގައި ފާހަގަކޮށްފައިވާ ގޮތުގައި، ޓްރިބިއުނަލުގެ ހުރިހާ ހަރަދެއް ވެސް ހިނގާފައި ވަނީ ބަޖެޓުގައި ކަނޑައެޅި ކަންކަމަށް، ކަނޑައެޅި މިންވަރަށް، މާލިއްޔަތު ޤަވާއިދުގައި ބަޔާންކޮށްފައިވާ އުސޫލުތަކާ އެއްގޮތަށެވެ.

ރައްޔިތުންގެ މަޖިލީހުން މިދިޔަ އަހަރަށް އެ ޓްރިބިއުނަލަށް ފާސްކޮށްދީފައި ވަނީ 13.4 މިލިއަން ރުފިޔާގެ ބަޖެޓެކެވެ. އޭގެ ތެރެއިން ރިކަރަންޓް ހަރަދުގެ ގޮތުގައި 12.03 މިލިއަން ރުފިޔާ ހޭދަވިއިރު، ކެޕިޓަލް ހަރަދުގެ ގޮތުގައި ހޭދަވެފައި ވަނީ 342,791 ރުފިޔާއެވެ.

މުވައްޒަފުންގެ މުސާރައާއި ޢިނާޔަތްތަކަށް 6.8 މިލިއަން ރުފިޔާ ހޭދަވެފައިވެއެވެ. އިމާރާތާއި ބިމުގެ ކުއްޔަށް ހަތަރު މިލިއަނަށްވުރެ ގިނަ ރުފިޔާ ޚަރަދުވެފައިވާއިރު، ހުރިހާ ހަރަދެއް ކެނޑުމަށް ފަހު ބާކީ ހުރީ 124,013 ރުފިޔާއެވެ.