ޗައިނާ-ރާއްޖެ އިންވެސްޓްމަންޓް ފޯރަމުގައި އިންވެސްޓަރުންނަށް ރައީސް ދައުވަތު ދެއްވައިފި

ޒިންމާދާރު އިންވެސްޓްމަންޓަށް ރާއްޖެ ހުޅުވިފައި އޮތް ކަމަށާއި އެ އިންވެސްޓްމަންޓް ކާމިޔާބު ކުރުމަށް ސަރުކާރު ތައްޔާރަށް ތިބި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.

މޯލްޑިވްސް އެކްސްޕޯ 2026 އާ ގުޅިގެން ބޭއްވި ޗައިނާ-ރާއްޖެ އިންވެސްޓްމަންޓް ކޯޕަރޭޝަން ފޯރަމުގައި ވާހަކަފުޅު ދައްކަވަމުން ރައީސް ވިދާޅުވީ މި ބައްދަލުވުމަކީ ހަމައެކަނި އިންވެސްޓްމަންޓާ ބެހޭ ގޮތުން މަޝްވަރާ ކުރުމުގެ ބަދަލުގައި ދެ ޤައުމުގެ ރައްޔިތުންނަށް ފައިދާ ކޮށްފައިވާ ގުޅުމުގެ އައު ބާބެއް ބައްޓަން ކުރުމުގެ ފޯރަމެއް ކަމަށެވެ. ރާއްޖެއާއި ޗައިނާއަކީ ޒަމާންވީ ކަނޑުގެ ވިޔަފާރިއާއި އިންސާނީ ގުޅުންތަކުން ގުޅިފައިވާ ދެ ޤައުމު ކަމަށާއި މިހާރު އެ ގުޅުން ފުޅާ ސްޓްރެޓީޖިކް ޕާޓްނާޝިޕަކަށް ބަދަލުވެފައިވާ ކަން ރައީސް ފާހަގަކުރެއްވިއެވެ.

2025 ވަނަ އަހަރުގެ ޖެނުއަރީ އެއް ވަނަ ދުވަހު ޢަމަލުކުރަން ފެށި ޗައިނާ-ރާއްޖެ މިނިވަން ވިޔަފާރީގެ އެއްބަސްވުމާ ގުޅޭ ގޮތުން ރައީސް ވިދާޅުވީ 2025 ވަނަ އަހަރުގެ ޖެނުއަރީން 2026 ވަނަ އަހަރުގެ އޮގަސްޓާ ދެމެދު ރާއްޖެއިން ޗައިނާއިން ގާތްގަނޑަކަށް 440 މިލިއަން ޑޮލަރުގެ މުދާ އެތެރެކޮށްފައިވާ ކަމަށެވެ. އޭގެ ތެރެއިން ގާތްގަނޑަކަށް 124 މިލިއަން ޑޮލަރު — ހަތަރުބައިކުޅަ އެއްބައެއްހައި މިންވަރު — އެތެރެވީ އެ އެއްބަސްވުމުގެ ދަށުން ކަމަށް ވެސް ވިދާޅުވިއެވެ. ވިޔަފާރީގެ ޢަދަދުތައް އިތުރު ކުރުމުގެ ބަދަލުގައި ވިޔަފާރީގެ ގުޅުންތައް ހަރުދަނާ ކުރުމުގެ މުހިންމުކަން ފާހަގަކުރައްވައި، ދިވެހި މަސްވެރިކަމުގެ ޕްރީމިއަމް އުފެއްދުންތަކާއި އަތްތެރި މަސައްކަތާއި ޚިދުމަތްތަކަށް ޗައިނާގެ ބާޒާރުގައި ފުރުޞަތު އޮތް ކަމަށް ރައީސް ވިދާޅުވިއެވެ. އެ ދާއިރާތަކުގައި ޗައިނާ ކުންފުނިތަކުން ދިވެހި ވިޔަފާރިތަކާ ގުޅިގެން މަސައްކަތް ކުރެއްވުމަށް ރައީސް ދައުވަތު ދެއްވިއެވެ.

ވިޝަން 2040 ގެ ލަނޑުދަނޑިއަކީ 2040 ވަނަ އަހަރުގެ ނިޔަލަށް ފުރިހަމައަށް ތަރައްޤީވެފައިވާ ޤައުމަކަށް ވުން ކަމަށް ވިދާޅުވެ، އެ ލަނޑުދަނޑި ޙާޞިލު ކުރުމަށް އިޤްތިޞާދު ފުޅާ ކުރުމާއި ކުރިމަގަށް ޔަޤީންކަން އޮތް އިންވެސްޓަރުންނާ ގުޅެންޖެހޭ ކަމަށް ރައީސް ވިދާޅުވިއެވެ. ހަތަރު ދަހައަށް ވުރެ ގިނަ އަހަރު ވަންދެން ޢަމަލުކުރި ޤާނޫނުގެ ބަދަލުގައި އައު ފޮރިން އިންވެސްޓްމަންޓް ޤާނޫނެއް ގެންނެވީ ސިޔާސަތުގެ ޔަޤީންކަމާއި ހާމަކަން އިތުރު ކުރެއްވުމަށް ކަމަށް ވެސް ވިދާޅުވިއެވެ. އިޢާދަކުރެވެނިވި ހަކަތައާއި ކާނާގެ ރައްކާތެރިކަމާއި ލޮޖިސްޓިކްސް އާއި ޒަމާނީ މަސްވެރިކަމުގެ ޕްރޮސެސިން އާއި ޑިޖިޓަލް ޓެކްނޮލޮޖީ އާއި އާޓިފިޝަލް އިންޓެލިޖެންސް އާއި ޞިއްޙީ ޚިދުމަތާއި މާލީ ޚިދުމަތާއި ސްމާޓް އިންފްރާސްޓްރަކްޗާ ފަދަ ދާއިރާތަކުން ފުރުޞަތު ހުޅުވިފައިވާ ކަން ރައީސް ފާހަގަކުރެއްވިއެވެ.

އިންވެސްޓްމަންޓުން ރާއްޖެއަށް ބޭނުންވަނީ ހަމައެކަނި ކެޕިޓަލް ނޫން ކަމަށާއި ޞިނާޢަތްތައް އުފެއްދުމާއި ހުނަރު ތަރައްޤީ ކުރުމާއި ވަޒީފާ އުފެއްދުމާއި ރައްޔިތުންނަށް ފުރުޞަތު ހުޅުވައިދިނުން ކަމަށް ރައީސް ވިދާޅުވިއެވެ. މި ފޯރަމުގައި ޗައިނާއިން ރާއްޖެއަށް ކަނޑައަޅުއްވާފައިވާ ސަފީރު ކޮންގް ޝިއެންހުއާ އާއި މިނިސްޓަރ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑް މުޙައްމަދު ސަޢީދު އާއި ކެބިނެޓް މިނިސްޓަރުންނާއި ސަރުކާރުގެ އިސް ބޭފުޅުން ބައިވެރިވެވަޑައިގެންނެވިއެވެ.