ގަނޑެއް ނެތަސް ފެނިދާނެ — އުރަމަތީގެ ކެންސަރުގެ ހަތް އަލާމާތް

އުރަމަތީގައި ގަނޑެއް އުފެދުމުގެ ކުރިން ހަންގަނޑާއި ވައްތަރާއި ކައިރި ހިސާބުތަކުން ފެންނަ ކުދި ބަދަލުތައް ކެންސަރުގެ ފުރަތަމަ އިންޒާރަކަށް ވެދާނެ ކަމަށް ޞިއްޙީ ތަޖުރިބާކާރުން ބުނެފިއެވެ.

ގިނަ މީހުންނަށް އުރަމަތީގެ ކެންސަރާ ގުޅިގެން ހިތަށް ސިފަވަނީ ގަނޑެކެވެ. އެކަމަކު ގަނޑެއް ނެތަސް ކެންސަރުގެ ނިޝާންތައް ފެނިދާނެއެވެ. ނިއު ދެއްލީގެ މަނީޕާލް ހޮސްޕިޓަލް ދުވާރުކާގެ ކެންސަރު ސެންޓަރުގެ ޗެއާމަން ޑރ. ސުރެންދާ ކުމާރު ދާބާސް ފާހަގަކުރައްވާ ގޮތުގައި ސަމާލުވާންޖެހޭ ހަތް އަލާމާތެއް ވެއެވެ. އެއީ ކުއްލިއަކަށް އުރަމަތީގެ ސައިޒަށް ނުވަތަ ބައްޓަމަށް ބަދަލު އައުމާއި، ހަންގަނޑު ވަދެގެން ގޮސް އޮރެންޖު ތޮށިގަނޑެއް ފަދައިން ފެނުމާއި، ރަތްކަން އުފެދި ނުފިލައި ދެމިހުރުމާއި، ވައްގަނޑު ކުއްލިއަކަށް އެތެރެއަށް ވަނުމާއި، ވައްގަނޑު ވަށައިގެން ހިކި ކުރަ ލުމާއި، ގާތުންދޭ ދުވަސްވަރެއް ނޫނީ ލޭ ފަދަ ދިޔައެއް ބޭރުވުމާއި، ކިހިލިފަތް ދޮށް ނުވަތަ ކޮނޑުހުޅާ ކައިރި ދުޅަވެ ގަނޑެއް ފެނުމެވެ.

ހަމުގެ ކުލަ ކަޅު މީހެއް ނަމަ ރަތްކަމަށްވުރެ ހަންގަނޑުގެ ޓެކްސްޗާ ބަދަލުވުމާއި ދުޅަވުން ފާހަގަކުރަން ފަސޭހަ ވެދާނެ ކަމަށް ޑރ. ދާބާސް ވިދާޅުވެފައިވެއެވެ. ސީދާ އުރަމައްޗަށް އެކަނި ނުބަލައި، ކައިރި ހިސާބުތަކުން ފެންނަ ދުޅަވުމަށް ވެސް ސަމާލުކަން ދިނުން މުހިންމެވެ.

ޕީ.ޑީ. ހިންދޫޖާ ހޮސްޕިޓަލުގެ ކޮންސަލްޓެންޓް ޑރ. ސަންދީޕް ބިޕްތޭ ފާހަގަކުރައްވާ ގޮތުގައި ހޭލުންތެރިކަމާއި ފަރުވާ ހޯދުމާ ދެމެދު ބޮޑު ފަރަގެއް އެބައޮތެވެ. އިންޑިއާގެ 2019-21 ގެ ނެޝަނަލް ފެމެލީ ހެލްތު ސާވޭގެ ޑޭޓާ ބޭނުންކޮށްގެން 30 އާއި 49 އާ ދެމެދު އުމުރުގެ 353,518 އަންހެނުންގެ މައްޗަށް ހެދި ދިރާސާއިން ދައްކާ ގޮތުގައި ކޮންމެ 1,000 އަންހެނަކުން އުރަމަތީގެ ޓެސްޓެއް ހެދީ ގާތްގަނޑަކަށް ނުވައެއްހާ މީހުންނެވެ. ތައުލީމު މަދު އަދި ފަގީރު ގޭބިސީތަކުގެ އަންހެނުން ޓެސްޓު ހެދި މިންވަރު އެއަށްވުރެ ވެސް ދަށެވެ. ބިރު، މާލީ ދަތިކަން، އަދި ޞިއްޙީ މަރުކަޒާ ދުރުގައި ދިރިއުޅެން ޖެހުމަކީ ވެސް ޓެސްޓު ލަސްވާ ސަބަބުތައް ކަމަށް ޑރ. ބިޕްތޭ ވިދާޅުވެފައިވެއެވެ.

ދުނިޔޭގެ ޞިއްޙަތު ޖަމިއްޔާއިން ލަފާކޮށްފައިވާ ގޮތުގައި 2024 ވަނަ އަހަރު ދުނިޔެއިން 2.4 މިލިއަން އަންހެނުންނަށް އުރަމަތީގެ ކެންސަރު ދެނެގަނެވިފައިވެއެވެ. އުރަމައްޗަށް އަންނަ ބަދަލުތަކުގެ ގިނައީ ކެންސަރެއް ނޫން ނަމަވެސް، ސީދާ ސަބަބު ޔަގީން ކުރެވޭނީ ރަނގަޅު ޞިއްޙީ މުޢާޔަނާއަކުންނެވެ. އެހެންކަމުން ކުޑަ ނަމަވެސް ބަދަލެއް ފާހަގަވާ ހިސާބުން ލަސްނުކޮށް ޑޮކްޓަރަށް ދެއްކުމަކީ ބުއްދިވެރި ގޮތެވެ.