ސަވާހެލި ސިޓީ ކައުންސިލުން ވަކިކުރި މައްސަލައިގައި ޝާހިދު ސަރުކާރަށް ފާޑު ވިދާޅުވެއްޖެ

އައްޑޫ ސިޓީގެ އިޚްތިޞާޞުން ސަވާހެލި ވަކިކޮށް މަރުކަޒީ ސަރުކާރުގެ ދަށަށް ބަދަލުކުރި މައްސަލައިގައި އެމްޑީޕީގެ ރައީސް އަބްދުﷲ ޝާހިދު ސަރުކާރަށް ވަރަށް ބޮޑަށް ފާޑު ވިދާޅުވެއްޖެއެވެ.

ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ ސަވާހެލި ސަރުކާރުގެ ދަށަށް ގެންދިޔައީ އައްޑޫ ސިޓީ ކައުންސިލުން އެ ރަށުގައި މުނިފޫހިފިލުވުމާއި ރެކްރިއޭޝަން ފެސިލިޓީއެއް ކުއްޔަށްދީ ތަރައްޤީކޮށް ހިންގުމަށް ބީލަމަށް ހުޅުވާލާފައި ވަނިކޮށް ކަމަށެވެ. އެ މަޝްރޫޢަކީ ޒުވާނުންނަށް ވަޒީފާގެ ފުރުސަތު ލިބި ފޭދޫގެ ފަތުރުވެރިކަމުގެ ޒޯނާއި އައްޑޫގެ އެހެން ރަށްތަކުގެ ގެސްޓްހައުސް ވިޔަފާރިއާއި ކުދި އަދި މެދުފަންތީގެ ވިޔަފާރިތަކާ ގުޅިލާމެހިފައި އޮތް އުއްމީދީ މަޝްރޫޢެއް ކަމަށް ޝާހިދު ވިދާޅުވިއެވެ.

"އެ ސިޓީގެ ރައްޔިތުންގެ މުސްތަޤުބަލާމެދު ގޮތް ނިންމަވަންވާނީ މާލޭގައި ފިނި ކޮޓަރީގައި ތިބޭބަޔެއްނޫން. އެސިޓީގެ ރައްޔިތުންގެ އަމިއްލަ މުސްތަޤުބަލު ބައްޓަންކުރާނެ ގޮތް ކަނޑައެޅުމުގެ ޙައްޤު އެސިޓީގެ ރައްޔިތުންނަށް އޮންނަން ވާނެ." ޝާހިދު ވިދާޅުވިއެވެ.

ޝާހިދު ވަނީ ސަވާހެލި މިހިނދުން މިހިނދަށް އައްޑޫ ސިޓީގެ ރައްޔިތުންނާ އަނބުރާ ހަވާލުކުރުމަށް ސަރުކާރަށް ގޮވާލައްވާފައެވެ.