ވިލިމާލެ-ގުޅީފަޅު ބްރިޖުގެ އެންމެ ފަހު ބައި އިންސްޓޯލްކޮށް ދެ ރަށް ގުޅާލައިފި

ވިލިމާލެއާއި ގުޅީފަޅާ ދެމެދު ބިނާކުރަމުން އަންނަ ބްރިޖުގެ ފަހު ސެގްމެންޓް އިއްޔެ ހަރުކޮށް، އެ ދެ ރަށް ބްރިޖުން ގުޅައިލައިފިއެވެ.

ހައުސިން މިނިސްޓަރު ޑރ. ޢަބްދުﷲ މުއްތަލިބު ރޭ ކުރެއްވި ޓްވީޓެއްގައި މި ކާމިޔާބީ ފާހަގަކުރައްވައި، މަޝްރޫޢު ހިންގާ އެފްކޮންސް އާއި އެރަޕް އަދި ހައުސިން މިނިސްޓްރީގެ ޓީމަށް މަރުޙަބާ ވިދާޅުވިއެވެ. އޭގެ އިތުރުން އިންޑިއާ ސަރުކާރުގެ އެހީތެރިކަމަށާއި މި މަސައްކަތުގައި ބައިވެރިވި ހުރިހާ ފަރާތްތަކަށް މިނިސްޓަރު ޝުކުރު ދެންނެވިއެވެ.

ރާއްޖޭގައި ހުންނަ އިންޑިއާ ހައި ކޮމިޝަނުން މިއަދު ކުރި ޓްވީޓެއްގައި ބުނެފައިވަނީ ރާއްޖޭގެ ސަރުކާރާ ގާތް ގުޅުމެއްގެ ތެރެއިން ރާއްޖޭގެ އުމްރާނީ ތަރައްޤީގައި ބައިވެރިވުމަކީ އިންޑިއާއަށް ލިބޭ އުފަލެއް ކަމަށެވެ. އެ ހައި ކޮމިޝަނުން ބުނެފައިވާ ގޮތުގައި މި މަޝްރޫޢުގެ ސަބަބުން ރާއްޖޭގެ އިޤުތިޞާދީ ކުރިއެރުމަށް އައު ފުރުޞަތުތައް ހުޅުވިގެންދާނެއެވެ.

ބްރިޖުގެ ހުރިހާ ސެގްމެންޓެއް ގުޅައިލެވުމާ އެކު، ދެން ކުރިއަށް ދާނީ ބްރިޖު ފުރިހަމަކޮށް ބޭނުންކުރެވޭ ޙާލަތަށް ގެނައުމުގެ މަރުޙަލާއެވެ.