އޭދަފުށީ އިސްލާމީ މަރުކަޒުގެ ބިންގާ އަޅައިފި

ބ. އޭދަފުށީގައި ސަރުކާރުން ބިނާކުރާ ދެ ފަންގިފިލާގެ އިސްލާމީ މަރުކަޒުގެ ބިންގާ މިއަދު އަޅައިފިއެވެ.

އެ ރަށުގައި ބޭއްވި ރަސްމިއްޔާތުގައި ބިންގާ އަޅުއްވައިދެއްވީ އިސްލާމީ ކަންތައްތަކާއި އައުގާފާ ބެހޭ މިނިސްޓްރީގެ ސްޓޭޓް މިނިސްޓަރު ޑރ. މުޙައްމަދު ޝުޖާޢު ޢަބްދުލްޙަކީމާއި ރައްޔިތުންގެ މަޖިލީހުގެ ނައިބު ރައީސް އަދި އޭދަފުށީ ދާއިރާގެ މެންބަރު އަޙްމަދު ސަލީމެވެ.

މި މަރުކަޒުގެ މިސްކިތް ބައިގައި 700 މީހުންނަށް އެއް ފަހަރާ ނަމާދުކުރެވޭ ޖާގަ ހުންނާނެއެވެ. އޭގެ އިތުރުން ތަފާތު ހަރަކާތްތައް ބޭއްވޭ ގޮތަށް ފަރުމާކޮށްފައިވާ މަލްޓިޕަރޕަސް ހޯލަކާއި ތިން ކްލާސްރޫމާއި ހިފްޒު ކްލާސްތަކަށް ޚާއްޞަ ބަޔަކާއި ލައިބްރަރީއަކާއި އޮފީސް ބައެއް އިމާރާތުގައި ހިމެނެއެވެ. ހިނަވާ ގެއެއް ވެސް މި މަޝްރޫޢުގެ ތެރޭގައި ހެދުމަށް ވަނީ ރާވައިފައެވެ.

ރަސްމިއްޔާތުގައި ސްޓޭޓް މިނިސްޓަރު ޑރ. ޝުޖާޢާއި މެންބަރު ސަލީމް ދެއްކެވި ވާހަކަފުޅުގައި ދީނީ ބިނާތައް ވަރުގަދަކުރުމުގެ މުހިންމުކަމާއި އިސްލާމީ ތަޢުލީމާއި އިޖުތިމާޢީ ޚިދުމަތް ފުޅާކުރެއްވުމުގެ ޒަރޫރަތުގެ މައްޗަށް އަލިއަޅުއްވައިލެއްވިއެވެ.

ސަރުކާރުގެ ޚަރަދުގައި ކުރިއަށް ގެންދާ މި މަޝްރޫޢު ހަވާލުކޮށްފައިވަނީ ސާސީ ކޮންސްޓްރަކްޝަން ޕްރައިވެޓް ލިމިޓެޑާއެވެ. ބ. އަތޮޅުގެ ވެރިކަންކުރާ ރަށް ކަމުގައިވާ އޭދަފުށީގެ އާބާދީ 2,500 އިން މައްޗަށް އަރައެވެ. ސަރުކާރުން މިހާރު ވެސް 12 ރަށެއްގައި އިސްލާމީ މަރުކަޒު ތަރައްޤީކުރަމުން ގެންދާއިރު، 16 ރަށެއްގައި ޤުރުއާނާ ބެހޭ މަރުކަޒު އަދި 45 އަށް ވުރެ ގިނަ މިސްކިތް އެކި ރަށްރަށުގައި ދަނީ ބިނާކުރަމުންނެވެ.