ފުލް މޫންއާ ދިމާކޮށް މުޅި ރާއްޖެއަށް އުދައިގެ އިންޒާރު ނެރެފި

މެޓް އޮފީހުން މިއަދު ވެސް ރާއްޖޭގެ އެންމެހައި ސަރަޙައްދުތަކަށް އުދަ އެރުމުގެ ފުރުޞަތު އޮތް ކަމަށް ބެލެވޭތީ ވައިޓް އެލާޓް ނެރެފިއެވެ. މި އެލާޓް ނެރެފައިވަނީ ހެނދުނު 11:30 އިން މެންދުރު ފަހު 3:30 އާ ހަމައަށެވެ.

އިއްޔެ ވެސް ދެ ފަހަރެއްގެ މަތިން މެޓް އޮފީހުން ހަމަ މި ބާވަތުގެ އެލާޓް ނެރެފައިވާ އިރު ފާއިތުވި އާދީއްތަ ދުވަހު ދިޔަވަރު ބޮޑުވެ މާލޭގެ ތަފާތު ސަރަޙައްދުތަކަށް އުދަ އެރައި ގެއްލުންތައް ލިބިފައިވެއެވެ.

މިއަދާއި މާދަމާ އުދައިގެ ނުރައްކާ އިތުރުވެދާނެ ކަމަށް ލަފާކުރެވެނީ މިއަދަކީ ހަނދު ފުރިހަމަވާ ދުވަސް ކަމަށް ވެފައި ހަނދު ދުނިޔެއާ އާދަޔާ ޚިލާފަށް ކައިރިން ދައުރުކުރާ ދުވަހަކަށް ވާތީއެވެ. "ބަކް މޫން"ގެ ނަން ދެވިފައިވާ މި ޙާދިސާގައި ހަނދު ފެންނަ ސައިޒު ޢާއްމު ފުލް މޫންއަށް ވުރެ ހަތް ޕަސެންޓް ބޮޑުވާނެ ކަމަށް ވެއެވެ.

ދުނިޔޭގެ އެކި ކަންކޮޅުތަކުގައި ވެސް މިއަދުގެ ހަނދު ވަނީ ޚާއްޞަ ސަމާލުކަމެއް ހޯދާފައެވެ.

ހަނދާއި ދުނިޔެ ކައިރިވުމުގެ އިތުރުން ހުޅަނގު މޫސުމުގެ ގަދަ ވައިގެ ސަބަބުން ވެސް މާލެ ހިމެނޭ ގޮތަށް ރާއްޖޭގެ ބައެއް ރަށްރަށަށް އުދައެރުމުގެ ފުރުޞަތު ބޮޑު ކަމަށް ބެލެވެއެވެ. މެޓް އޮފީހުގެ ލަފާ ކުރުންތައް ދައްކާ ގޮތުން މާލެއަށް ދިޔަވަރު އެންމެ މައްޗަށް ދާނީ މެންދުރު ފަހު 1:33 ގައި 2.6 ފޫޓަށް ކަމަށާއި ރާއްޖޭގެ ދެކުނުގެ އަތޮޅުތަކުގައި 2:10 ގައި 3 ފޫޓަށް ދިޔަވަރު އުފުލޭނެ ކަމަށް ލަފާކުރެވެއެވެ.