ލެބްރޯން ޖޭމްސް ލޭކާސް ދޫކޮށް ފިލަޑެލްފިއާ ސެވެންޓީ ސިކްސާސްއާ ގުޅެނީ

އެން.ބީ.އޭ.ގެ ތާރީޚުގައި އެންމެ ވިދައި ބެބުޅުނު އެއް ކުޅުންތެރިޔާ ލެބްރޯން ޖޭމްސް ލޮސް އެންޖެލެސް ލޭކާސް ދޫކޮށް ފިލަޑެލްފިއާ ސެވެންޓީ ސިކްސާސްއާ ގުޅާކަން ހުކުރު ދުވަހު ސޯޝަލް މީޑިއާ މެދުވެރިކޮށް އިޢުލާންކޮށްފިއެވެ.

ޢުމުރުން 41 އަހަރުގެ ޖޭމްސް ބުނީ މިއީ އޭނާގެ ކެރިއަރުގައި ނިންމާ "އެންމެ ފަހު ނިންމުން" ކަމަށާއި ކުޅުން ހުއްޓާލުމާ މެދު ވަރަށް ސީރިއަސްކޮށް ވިސްނި ކަމަށެވެ. ޖޭމްސް 23 ވަނަ އެން.ބީ.އޭ. ސީޒަން ނިމުނު އިރު އެއީ އެންމެ ފަހު ކުޅުން ކަމަށް ޤަބޫލުކުރެވުނު ކަމަށް އޭނާ ހާމަކުރިއެވެ.

"އެ ފަހު ޕްރެސް ކޮންފަރެންސްގައި ތެދުތެދަށް ބުނިން އަމިއްލަ ނަފުސާ ދޭތެރޭ ވިސްނާލައި މި ކުޅިވަރު ދެކެ އަދިވެސް ލޯބިވޭތޯ ކަނޑައަޅަން ޖެހޭ ކަމަށް. އަހަރެން އަދިވެސް ހަޤީޤަތުގައި މި ކުޅިވަރު ދެކެ ލޯބިވޭ އަދި ދެވޭނެ އެއްޗެހި އެބަހުރި" ޖޭމްސް ލިޔެފައިވެއެވެ.

ސެވެންޓީ ސިކްސާސްއަށް ޗެމްޕިއަންޝިޕް ހޯދައިދެވޭނެ ކަމުގެ ޔަޤީންކަން އެބައޮތް ކަމަށް ޖޭމްސް ބުންޏެވެ. "ފައިސާއަކަށް ނޫން. ޢާއިލާއަކަށް ނޫން. މި ހިސާބަށް އައިސް ހަޤީޤަތުގައި ކުޅެނީ ކީއްކުރަންތޯ އަދިވެސް ޤުރުބާންވާން ބޭނުން. އަދިވެސް މަސައްކަތް ކުރަން ބޭނުން. އަދިވެސް ވާދަކޮށް މޮޅުވެ މޮޅުވުމުގެ އިޙުސާސް ލިބުމުގެ ފުރުސަތު ބޭނުން" ޖޭމްސް ލިޔެފައިވެއެވެ.

އީ.އެސް.ޕީ.އެން. ރިޕޯޓްކުރާ ގޮތުގައި ޖޭމްސް ސެވެންޓީ ސިކްސާސްއާ ގުޅެނީ ދެ އަހަރުގެ 8 މިލިއަން ޑޮލަރުގެ ކޮންޓްރެކްޓެއްގައެވެ. ފާއިތުވި ސީޒަނުގައި އޭނާއަށް ގާތްގަނޑަކަށް 53 މިލިއަން ޑޮލަރު ލިބުނެވެ. ސެވެންޓީ ސިކްސާސްއިން އެންމެ ފަހުން ޗެމްޕިއަންޝިޕް ހޯދީ 1983 ވަނަ އަހަރު ކަމަށް ވާއިރު 2001 ވަނަ އަހަރުގެ ފަހުން އީސްޓާން ކޮންފަރެންސް ޕްލޭއޮފްގެ ދެ ވަނަ ބުރު ފަހަނައެޅެވިފައެއް ނުވެއެވެ. ޖޭމްސް ގުޅޭ މި ޓީމުގައި އޯލް-ސްޓާރުން ކަމަށްވާ ޖ೮އެލް އެމްބީޑް ޓައިރީސް މެކްސީ އަދި ސެލްޓިކްސް އިން ބަދަލުކޮށްގެން ގެނައި ޖެއިލެން ބްރައުން ހިމެނެއެވެ.