ކުޑަ އަންހެން ކުއްޖަކަށް ޖިންސީ ގޯނާކުރި ކަމުގެ ތުހުމަތުގައި 42 އަހަރުގެ ބިދޭސީއަކު ހައްޔަރުކޮށްފި

ސައުތު ޕޮލިސްގައި ހިމެނޭ ރަށެއްގައި 16 އަހަރުގެ އަންހެން ކުއްޖަކަށް ޖިންސީ ގޯނާކުރި ކަމުގެ ތުހުމަތުގައި 42 އަހަރުގެ ބިދޭސީ ފިރިހެނަކު އިއްޔެ ހައްޔަރުކޮށްފިއެވެ.

ފުލުހުން މިއަދު މީޑިއާތަކާ ހިއްސާކުރި މަޢުލޫމާތުގައިވާ ގޮތުން މި މައްސަލަ އެ މުއައްސަސާއަށް ހުށަހެޅީ އިއްޔެއެވެ. އެ ރިޕޯޓާ ގުޅިގެން ހަމަ އެ ދުވަހު ތުހުމަތުކުރެވޭ ފިރިހެން މީހާ ވަނީ ހައްޔަރުކޮށްފައެވެ.

ފާއިތުވި ހަފުތާތަކުގައި ކުޑަކުދިންނާ ދެކޮޅަށް ހިންގާ ޖިންސީ ގޯނާގެ މައްސަލަތައް ގިނަ ޢަދަދަކަށް ރާއްޖެއިން ރިޕޯޓުކޮށްފައިވެއެވެ. އެގޮތުން ދެކުނުގެ ރަށެއްގައި 13 އަހަރުގެ އަންހެން ދަރިފުޅަށް ޖިންސީ ގޯނާއާއި ނަފްސާނީ އަދި ޖިސްމާނީ އަނިޔާ ދިން ކަމުގެ ތުހުމަތުގައި ބައްޕައަކު މިދިޔަ ހޯމަ ދުވަހު ހައްޔަރުކޮށްފައިވެއެވެ. އެ ކުއްޖާއަށް އަނިޔާކުރީ އިތުބާރު ކުރެވޭ މަގާމެއްގައި ހުރި މީހެއް ކަމަށް ފުލުހުން ބުނެފައިވެއެވެ.

ހަމައެހެންމެ ސައުތު ސެންޓްރަލް ޕޮލިސްގައި ހިމެނޭ ރަށެއްގައި ތިން އަހަރުގެ އަންހެން ކުއްޖަކަށް ޖިންސީ ގޯނާކޮށް އެ މަންޒަރުތައް ރެކޯޑުކުރި ކަމުގެ ތުހުމަތުގައި 28 އަހަރުގެ ދިވެހި ފިރިހެނަކު ކޯޓު އަމުރެއްގެ ދަށުން ހައްޔަރުކޮށްފައިވެއެވެ. އެ މައްސަލައިގައި ވެސް ހައްޔަރުކުރީ ކުއްޖާގެ ބައްޕައެވެ. އެ ކުއްޖާގެ މަންމަގެ ބައިވެރިވުމެއް އޮތްތޯ ތަޙުޤީޤު ތެރެއިން ބަލަމުންދާ ކަމަށް ފުލުހުން އޭރު ބުނި ނަމަވެސް އެ ކަމާ ގުޅޭ އިތުރު މަޢުލޫމާތެއް މިހާތަނަށް ހާމަކޮށްފައެއް ނުވެއެވެ.

ފުލުހުންގެ ތަފާސްހިސާބުތައް ދައްކާ ގޮތުން މި އަހަރު މިހާތަނަށް ޖިންސީ ކުށުގެ 174 މައްސަލައެއް ރިޕޯޓުކޮށްފައިވެއެވެ.