ސަޢޫދީ ތެޔޮ ހިފައިގެން ދަތުރުކުރާ ޗައިނާގެ ދެ ތެޔޮ އުފުލާ ބޯޓު ރަތްކަނޑުން ނުކުތުމަށް ބާބު އަލްމަންދަބާ ދިމާލަށް ދަތުރުކުރަނީ

ސަޢޫދީ އަރަބިއްޔާގެ 4 މިލިއަން ފީފާގެ ތެޔޮ ބަރުކޮށްގެން ދަތުރުކުރާ ޗައިނާގެ ދެ ތެޔޮ އުފުލާ ބޯޓު، ރަތްކަނޑުން ނުކުތުމަށްޓަކައި ބާބު އަލްމަންދަބު ކަނޑުއޮޅިއާ ދިމާލަށް ދަތުރުކުރަމުންދާ ކަމަށް ޝިޕިންގ ޑޭޓާއާ ހަވާލާދީ ރޮއިޓާސްއިން ރިޕޯޓުކޮށްފިއެވެ.

މި ދެ ބޯޓުގެ ދަތުރަކީ ސަޢޫދީ އަރަބިއްޔާއާ ދެކޮޅަށް ހޫތީން އިޢުލާނުކޮށްފައިވާ ކަނޑުގެ ބްލޮކޭޑް ތަންފީޒުކުރާ މިންވަރު ވަޒަންކުރުމަށް ކުރެވޭ އިމްތިޙާނެއް ކަމަށް ގިނަ މާހިރުން ވަނީ ފާހަގަކޮށްފައެވެ.

ރޮއިޓާސްއިން މަޢުލޫމާތުދޭ ގޮތުގައި، މި ދަތުރުގައި ބައިވެރިވާ ބޯޓުތަކުގެ ތެރޭގައި ސިންގަޕޫރުގެ ދިދަ ނަގާފައިވާ 'ޒިން ލޯންގް ޔަންގް' ނަމަކަށް ކިޔާ ވީއެލްސީސީ ބޯޓު ހިމެނެއެވެ. މި ބޯޓު އަންގާރަ ދުވަހު ރަތްކަނޑުގެ މެދުތެރެއިން ދަތުރު މެދުކަނޑާލުމަށްފަހު، ބުދަ ދުވަހު އަލުން ދެކުނަށް ދަތުރުފަށައި، ޗައިނާގެ ގިންޒޫއަށް ދިއުމަށް ވަނީ މިސްރާބު ޖަހާފައެވެ. ދެވަނަ ބޯޓަކީ ޗައިނާގެ ދިދަ ނަގާފައިވާ 'ކޮސްނިއު ލޭކް' ނަމަކަށް ކިޔާ ވީއެލްސީސީ ބޯޓެވެ. މި ބޯޓު ދަތުރުކުރަމުންދަނީ ގުއާންގްޑޮންގްގެ ހުއިޒޫއަށެވެ.

މި ދެ ބޯޓުގެ އޮޓޮމެޓިކް އައިޑެންޓިފިކޭޝަން ސިސްޓަމް (އޭއައިއެސް) ޓްރާންސްމީޓަރުތަކުން ދައްކާ ގޮތުގައި، ދެ ބޯޓުގައިވެސް ތިބީ ޗައިނާގެ ފަޅުވެރިންކަން ރޮއިޓާސްއިން ފާހަގަކޮށްފައިވެއެވެ.

މިއަދުވެސް ހޫތީން ވަނީ ސަޢޫދީ އަރަބިއްޔާގެ ދެ ތެޔޮ އުފުލާ ބޯޓަކަށް ޑްރޯން އަދި މިސައިލް ބޭނުންކޮށްގެން ޙަމަލާދީފައެވެ.