ސިފައިންގެ 73 ވަނަ އަސާސީ ކޯހުން 117 ދަރިވަރުން ދަސްވެނިވެއްޖެ

ޤައުމީ ދިފާޢީ ބާރުގެ އަސާސީ ތަމްރީނު ކޯހުގެ 73 ވަނަ ބެޗް ފުރިހަމަކުރި ދަރިވަރުންގެ ދަސްވެނިވުމުގެ ރަސްމިއްޔާތު މިއަދު ގިރިފުށީ ޓްރެއިނިން ސެންޓަރުގައި ބާއްވައިފިއެވެ.

މި ބެޗުން ޖުމްލަ 117 ދަރިވަރުން ދަސްވެނިވިއިރު އޭގެ ތެރޭގައި ހިމެނެނީ 95 ފިރިހެން ދަރިވަރުންނާއި 22 އަންހެން ދަރިވަރުންނެވެ. ރަސްމިއްޔާތު ޝަރަފުވެރިކޮށްދެއްވީ ދިފާޢީ އަދި ވަޠަނީ ޚިދުމަތާ ބެހޭ ވަޒީރު ޙަސަން ރަޝީދެވެ.

ވަޒީރު ރަޝީދު ވަނީ ލަޝްކަރު ބަލައި ފާސްކުރެއްވުމުގެ އިތުރުން ކޯހުން ވަނަ ހޯދި ދަރިވަރުންނަށް އިނާމު ދެއްވާފައެވެ.

ދިފާޢީ ބާރާ އަލަށް ގުޅޭ މީހުންނަށް ޚާއްޞަކޮށް ހިންގާ މި ކޯހުގެ މައިގަނޑު ލަނޑުދަނޑިއަކީ ކޮންމެ ސިފައިންގެ މީހެއްގެ ކިބައިގައި ޤައުމީ ލޯތްބާއި ރިވެތި އަޚްލާޤާއި ހަށިހެޔޮކަމާއި ކިޔަމަންތެރިކަން ބިނާކުރުމެވެ.

އެއާއެކު ސިފައިންގެ ތަފާތު ދާއިރާތަކުގައި މަސައްކަތް ކުރެވޭނެ ފެންވަރަށް އަސާސީ ހުނަރާއި ޢިލްމު ދަސްކޮށްދިނުމަކީ ވެސް ކޯހުގެ އެއް އަމާޒެވެ.