"ވަޒީފާ ބުރާސްފަތި" ގެ ނަމުގައި މާލޭގެ ރަސްފަންނު ސަރަހައްދުގައި މިރޭ އިހުތިޖާޖު ކުރަން ދިވެހިރާއްޖޭގެ ޑިމޮކްރެޓިކް ޕާޓީ (އެމްޑީޕީ) އިން ނިންމައިފިއެވެ.

މި އިހުތިޖާޖު ބޭއްވުމަށް ހަމަޖެހިފައިވަނީ ރަސްފަންނު ސަރަހައްދުގައި މިރޭ 8:30 ގައެވެ.

އެމްޑީޕީން ބުނާ ގޮތުގައި، މި ހަރަކާތަކީ މިހާރުގެ ސަރުކާރުން މުވައްޒަފުންނާ މެދު ހިންގަމުންދާ ކަމަށް އެ ޕާޓީން ތުހުމަތުކުރާ ބައެއް ފިޔަވަޅުތަކާ ދެކޮޅަށް އަޑުއުފުލުމަށް ބާއްވާ ހަރަކާތެކެވެ. އޭގެ ތެރޭގައި ގާނޫނާ ހިލާފަށް އަދި ނުހައްގުން ވަޒީފާތަކުން ސަސްޕެންޑްކުރުމާއި، ވަޒީފާއިން ވަކިކުރުން ފަދަ ކަންކަން ހިމެނޭ ކަމަށް އެ ޕާޓީން ބުނެއެވެ.

މި އިހުތިޖާޖަށް ތައްޔާރުވުމުގެ ގޮތުން އެމްޑީޕީން ވަނީ މުޅި ރާއްޖޭގައި މި ހަރަކާރް ކުރިއަށްގެންދިޔުމަށް ނިންމާފައެވެ. އެ ޕާޓީން ބުނާ ގޮތުގައި، ސިޔާސީ ސަބަބުތަކަށްޓަކައި އަދި ހަރަދު ކުޑަކުރުމުގެ ނަމުގައި ކުންފުނިތަކާއި ދައުލަތުގެ އެކި މުއައްސަސާތަކުން ގިނަ އަދަދެއްގެ މުވައްޒަފުން ވަކިކުރަމުންދާ ކަމުގެ ޝަކުވާ އެ ޕާޓީއަށް ދަނީ ލިބެމުންނެވެ.

މި އިހުތިޖާޖުގައި ބައިވެރިވުމަށް އެމްޑީޕީން ވަނީ ވީހާވެސް ގިނަ އަދަދެއްގެ ރައްޔިތުން ރަސްފަންނަށް ހާޒިރުވުމަށް އާންމުކޮށް ދައުވަތު ދީފައެވެ. މި އެއްވުމުގައި ޕާޓީގެ އިސްވެރިންނާއި، ރައްޔިތުންގެ މަޖިލީހުގެ މެންބަރުންނާއި، އާންމު މެންބަރުން ބައިވެރިވުމަށް ވަނީ ހަމަޖެހިފައެވެ.