އޯޕެކް ޕްލަސް އިން ސެޕްޓެމްބަރުގައި ތެޔޮ އުފެއްދުން އިތުރުކުރަން ނިންމައިފި

އޯޕެކް ޕްލަސް އިއްތިހާދުގެ ހަތް ޤައުމަކުން ސެޕްޓެމްބަރު މަހުން ފެށިގެން ދުވާލެއްގެ މައްޗަށް ގާތްގަނޑަކަށް 188000 ފީފާ ތެޔޮ އުފެއްދުން އިތުރުކުރުމަށް މިއަދު ނިންމައިފިއެވެ.

މި ނިންމުން އިޢުލާންކޮށްފައިވަނީ ސަޢޫދީ ޢަރަބިއްޔާ ރަޝިޔާ ޢިރާޤު ކުވައިތު ކަޒަކިސްތާން އަލްޖީރިއާ އަދި ޢޫމާން ގުޅިގެން ނެރުނު ބަޔާނެއްގައެވެ. އެ ބަޔާނުގައި ބުނެފައިވާ ގޮތުން މި ފިޔަވަޅަކީ ބައިނަލްއަޤުވާމީ ތެލުގެ ބާޒާރުގެ ހަމަޖެހުން ދެމެހެއްޓުމަށް ޤައުމުތަކުން ގެންގުޅޭ މުޝްތަރަކު ސިޔާސަތުގެ ދަށުން ނިންމި ނިންމުމެކެވެ.

2023 ވަނަ އަހަރު އެއްބަސްވެފައިވާ ދުވާލެއްގެ މައްޗަށް 1.65 މިލިއަން ފީފާގެ ތެޔޮ ސަޕްލައި ކުޑަކުރުމުގެ ފިޔަވަޅު ބައިބަޔަށް ބައިކޮށް އުވައިލުމުގެ މަރުހަލާ ސެޕްޓެމްބަރު މަހުގެ މި ނިންމުމާއެކު ނިމުމަކަށް އާދެއެވެ.

އެ އެއްބަސްވުން ވެވުނު އިރު ޔޫއޭއީ ވެސް ބައިވެރިވިއެވެ. ނަމަވެސް ޔޫއޭއީ ވަނީ މެއި މަހު އޯޕެކުން ވަކިވެފައެވެ.

ރައިސްޓެޑް އެނަރޖީގެ ތަޙުލީލުކުރައްވާ ޖޯޖް ލިއޯން ވިދާޅުވީ "އޯޕެކް ޕްލަސް އިން އިޚުތިޔާރީ ތެޔޮ ކުޑަކުރުންތައް އެއްކޮށް ނިންމާލައިފި. ދެން އޮތް ގޮންޖެހުމަކީ އެކްސްޕޯޓް ފްލޯ ހަމައަކަށް އެޅޭ ވަރަކަށް ބާޒާރުގައި އުފެދިދާނެ ސާޕްލަސް މެނޭޖުކުރުން" ކަމަށެވެ. އެހެންނަމަވެސް މިވަގުތު ސްޓްރެއިޓް އޮފް ހޮރްމޫޒް ބަންދުވެފައި އޮތުމުން ކުރު ރާސްތާގައި ބާޒާރަށް ބޮޑު ބަދަލެއް ނާންނާނެ ކަމަށާއި ޙަޤީޤީ އަސަރު ފެންނާނީ ތެޔޮ އެކްސްޕޯޓުގެ ދައުރު ހަމައަކަށް އެޅުމުން ކަމަށް އޭނާ ފާހަގަކުރެއްވިއެވެ.