ހޫޘީންގެ މިސައިލް ހަމަލާ ކުށްވެރިކޮށް ސައުދީއާ އެކު ދެމިތިބޭނެ ކަމަށް ރާއްޖެއިން ބުނެފި
Houthi'in ge missile hamalaa kuvveri koh Saudi aa eku dhemi thibeyne kamah Rajje in bunefi
Ahmed Aahil Saeed
29 July 2026
ދިވެހި ހާރިޖިއްޔާގެ އޮފީސް އިމާރާތް... ފޮޓޯ: ވޮއިސް
ރަތްކަނޑުގައި ދަތުރުކުރި ސައުދީ އަރަބިއްޔާގެ ތެޔޮ ޓޭންކަރަކަށް ޔަމަނުގެ ހޫޘީ ޖަމާއަތުން ބެލިސްޓިކް މިސައިލަކުން ހަމަލާ ދިން މައްސަލަ ދިވެހި ސަރުކާރުން ހަރުކަށި އިބާރާތުން މިއަދު ކުށްވެރިކޮށްފިއެވެ.
ހޯމަ ދުވަހު ދެވުނު މި ހަމަލާއައީ ސައުދީ އުޅަނދުފަހަރު ރަތްކަނޑުން ދަތުރުކުރުން މަނާކޮށް ހޫޘީން ކަނޑުގެ ބްލޮކޭޑެއް އިއުލާނުކުރިތާ ހަފުތާއަކަށް ވުރެ ގިނަ ދުވަސް ފާއިތުވީ ފަހުންނެވެ.
ޚާރިޖިއްޔާއިން ނެރުއްވި ބަޔާނުގައި ފާހަގަކޮށްފައިވާ ގޮތުގައި މިބާވަތުގެ ހަމަލާތަކާ ހެދި ބައިނަލްއަޤުވާމީ ކަނޑުދަތުރުފަތުރުގެ މިނިވަންކަމާއި ސަލާމަތަށް ސީރިއަސް ނުރައްކާތައް ފެންމަތިވެއެވެ. މީގެ އިތުރުން ދުނިޔޭގެ އިޤުތިޞާދަށާއި ހަކަތައިގެ ރައްކާތެރިކަމަށް އަދި ސަރަޙައްދީ ހަމަޖެހުމަށް ވެސް ނޭދެވޭ އަސަރު ފޯރާނެ ކަމަށް ރާއްޖެއިން ދެކެއެވެ. ދިވެހި ސަރުކާރުން ސިފަކުރާ ގޮތުގައި މިއީ ދުނިޔެއަށް ހަކަތަ ފޯރުކޮށްދިނުމުގައި ނުހަނު މުހިންމު ދައުރެއް އޮންނަ ރަތްކަނޑާއި ބާބުލް މަންދަބް ސަރަޙައްދުގެ ހަމަޖެހުން ގެއްލުވައިލުމަށް ހިންގި ނުރައްކާތެރި ޢަމަލެކެވެ.
ދިވެހި ސަރުކާރުން ވަނީ އދ.ގެ ސަލާމަތީ މަޖިލީހުގެ ޤަރާރު ނަންބަރު 2216 އަދި 2722 ތަންފީޒުކުރުމަށާއި ކަނޑުތަކާ ބެހޭ ބައިނަލްއަޤުވާމީ ޤާނޫނުތައް ހިމާޔަތްކުރުމަށް ބައިނަލްއަޤުވާމީ މުޖުތަމަޢަށް ގޮވައިލައިފައެވެ.
ސައުދީ އަރަބިއްޔާގެ ސަރުކާރާއި ރައްޔިތުންނާ އެކީ ސާބިތުކަމާ އެކު ދެމިތިބޭނެ ކަމުގެ ޔަޤީންކަން ރާއްޖެއިން ދީފައިވާ އިރު ސައުދީގެ އިސްތިޤުލާލާއި ސަލާމަތް ރައްކާތެރިކުރުމަށް އެ ޤައުމުން އަޅާ ކޮންމެ ފިޔަވަޅަކަށް ރާއްޖެއިން ފުރިހަމައަށް ތާއީދުކުރާ ކަން ވެސް ސަރުކާރުން ހާމަކޮށްފައިވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
