ޕަމްޕު ސްޓޭޝަންތައް ނުނިމި ހުރުމުން ބޮޑުތަކުރުފާނުމަގަށް ފެންގަނޑު ބޮޑުވަނީ

މާލޭގެ ބޮޑުތަކުރުފާނުމަގުގެ އަލަށް ހެދި ސަރަޙައްދުގައި ފެން ހެދެމުންދާ ސަބަބަކީ އެ މަގުގައި ޤާއިމުކުރަން ރާވާފައިވާ ތިން ޕަމްޕު ސްޓޭޝަނެއްގެ މަސައްކަތް އަދި ފުރިހަމަ ނުވެ އޮތުން ކަމަށް އެމްޓީސީސީން ހާމަކޮށްފިއެވެ.

މިހާރު ރާއްޖެއަށް ކުރަމުންދާ ވިއްސާރައާ ގުޅިގެން އެ މަގުގައި ފެން ބޮޑުވާ މައްސަލަ ފެންމަތިވުމުން އެމްޓީސީސީން ނެރުނު ބަޔާނެއްގައި ވަނީ މި ކަމަށް ތަފްސީލް ދެއްވައިފައެވެ.

ސަރުކާރުން އެ ކުންފުންޏާ ޙަވާލުކޮށްގެން ތަރައްޤީ ކުރި ބޮޑުތަކުރުފާނުމަގު މިހާރު ޢާންމު ދަތުރުފަތުރަށް ހުޅުވައިލާފައި ވީ ނަމަވެސް އެ މަގުގައި ނިންމަން ޖެހޭ އިތުރު މަސައްކަތްތަކެއް ބާކީ ހުރި ކަން ކުންފުނިން ވަނީ ފާހަގަކޮށްފައެވެ.

މި މައްސަލައާ ގުޅޭ ގޮތުން އެމްޓީސީސީން މީގެ ކުރިން މި މަހުގެ 24 ވަނަ ދުވަހުވެސް ބަޔާނެއް ނެރެ އެ މަގުގައި ފުރިހަމަ ނުވެ ހުރި މަސައްކަތްތައް ހުރި ކަން ބަޔާންކޮށްފައިވެއެވެ.

ޕަމްޕު ސްޓޭޝަންތަކުގެ މަސައްކަތް ނިމުމުން ފެން ހިންދުމުގެ މައްސަލައަށް ޙައްލެއް ލިބިގެންދާނެ ކަމަށް ބެލެވެއެވެ.