ގެއްލުނު ދެ ބިދޭސީން ހޯދުމަށް ކަނޑުމަގާއި ވައިގެ މަގުން ފުޅާ ދާއިރާއެއްގައި ސާޗް އޮޕަރޭޝަން ހިންގައިފި

ކ. ގާފަރު ސަރަހައްދުގައި އަޑިއަށް ދިޔަ ކޮޅުވެއްޓިން ވީނުވީއެއް ނޭނގި ގެއްލުނު ދެ ބިދޭސީން ހޯދުމަށް ކަނޑުމަގާއި ވައިގެ މަގުން ފުޅާ ދާއިރާއެއްގައި ސާޗް އޮޕަރޭޝަން ހިންގައިފިއެވެ.

މި ހާދިސާ ހިނގީ ތިލަފުށިން ފުރައިގެން ދަތުރުކުރި ކޮޅުވެއްޓިއެއް ދިޔަވެ ގާފަރު ކައިރިއަށް އަޑިއަށް ދާން ފެށުމުންނެވެ. ހުކުރު ދުވަހުގެ ހެނދުނު 08:48 ހާއިރު ފުލުހުންނަށް މި ޚަބަރު ލިބުނުއިރު އުޅަނދުގައި ޖުމްލަ 10 މީހުން ތިއްބެވެ. އޭގެ ތެރެއިން 8 މީހުން ސަލާމަތްކުރެވުނު ނަމަވެސް ދެ މީހުން ވަނީ ގެއްލިފައެވެ.

އެމްއެންޑީއެފުން ހާމަކުރި ގޮތުގައި ވައިގެ މަގާއި ކަނޑު މަގުން ޖުމްލަ 3182 އަކަ ނޯޓިކަލް މޭލުގެ ސަރަހައްދެއް އެއަރ ކޯރ މެދުވެރިކޮށް ބެލިފައިވެއެވެ. އެއާއެކު ކޯސްޓްގާޑް ޝިޕް ޢިމާދުއްދީނާއި ފާސްޓް އިންޓަސެޕްޓް ކްރާފްޓް ބޭނުންކޮށްގެން 441 އަކަ ނޯޓިކަލް މޭލުގެ ސަރަހައްދެއް ވެސް ވަނީ ބަލައިފައެވެ.

މީގެ އިތުރުން ޑައިވަރުން 675120 އަކަ މީޓަރުގެ ސަރަހައްދެއް ފީނައިގެން ބެލި ނަމަވެސް ގެއްލުނު ދެ މީހުންގެ އެއްވެސް ނިޝާނެއް ފެނިފައެއް ނުވެއެވެ.

ގެއްލުނު ދެ ބިދޭސީން ހޯދުމުގެ އޮޕަރޭޝަން އެމްއެންޑީއެފް ކޯސްޓްގާޑުން ހުއްޓުމެއް ނެތި ކުރިއަށް ގެންދެއެވެ.