ރޮހިންޔާ ރެފިއުޖީންގެ 5،000 މީހުން އަނބުރާ ގެންދަން މިޔަންމާ އެއްބަސްވެއްޖެ

މެލޭޝިޔާގައި ދިރިއުޅެމުންދާ ރޮހިންޔާ ދަރިކޮޅުގެ 5,000 ރެފިއުޖީން އެނބުރި ޤައުމަށް ގެންދިޔުމަށް މިޔަންމާ ސަރުކާރު ރުހިފައިވާކަން މެލޭޝިޔާގެ ބޮޑުވަޒީރު އަންވަރު އިބްރާހީމް އިޢުލާނުކުރައްވައިފިއެވެ.

ޖުލައި 29 ގައި ބޭއްވި ކެންޕޭން ޖަލްސާއެއްގައި ބޮޑުވަޒީރު ވިދާޅުވި ގޮތުގައި ދެ ޤައުމު ދެމެދު އޮންނަ ގާތް ގުޅުމުގެ މައްޗަށް ބިނާކޮށް ކުރެވުނު މަޝްވަރާތަކުގެ ނަތީޖާއެއްގެ ގޮތުން މިޔަންމާ ސަރުކާރުން މި ނިންމުމަށް އެއްބަސްވީއެވެ. ރޮހިންޔާ ރެފިއުޖީންނާއި ދޭސީ ރައްޔިތުންނާ ދެމެދު ނުތަނަވަސްކަން އުފެދިފައިވާ ދަނޑިވަޅެއްގައި މި ޚަބަރު ހާމަކުރެއްވިއިރު މެލޭޝިޔާގެ ދާޚިލީ ވަޒީރު ސައިފުއްދީން ނަސޫޝިޔަން އިސްމާޢީލް ވިދާޅުވީ ފޮނުވާލާނެ ރެފިއުޖީން ކަނޑައެޅުމުގެ މަސައްކަތް އެ ވުޒާރާއާ ރަސްމީކޮށް ޙަވާލުކޮށްފައިވާ ކަމަށެވެ. ޚާރިޖީ ވުޒާރާ މެދުވެރިކޮށް މިޔަންމާއާ އެކު އިތުރު ވާހަކަތައް ކުރިއަށް ގެންދާނެ ކަމަށް ވެސް އޭނާ ފާހަގަކުރެއްވިއެވެ. އެކަމަކު މިޔަންމާ ސަރުކާރުންނާއި ރެފިއުޖީންނާ ބެހޭ އދގެ އޮފީހުން މި ކަމާ ގުޅޭ ގޮތުން އެއްވެސް ބަހެއް ނުބުނެއެވެ.

މިޔަންމާ ސަރުކާރާއި އެ ޤައުމުގެ އަސްކަރިއްޔާގެ އަނިޔާވެރިކަމުން ފިލައިގެން މެލޭޝިޔާއަށް ހިޖުރަކޮށްފައިވާ ރޮހިންޔާ ދަރިކޮޅުގެ 126,000 އަށް ވުރެ ގިނަ މީހުން އދގެ ރެފިއުޖީ އޮފީހުގައި ރަޖިސްޓަރީ ކޮށްފައިވެއެވެ. ނަމަވެސް ރެފިއުޖީންނާ ބެހޭ ބައިނަލްއަޤުވާމީ މުޢާހަދާގައި މެލޭޝިޔާ ބައިވެރިނުވާތީ ރޮހިންޔާ ރެފިއުޖީންނަކީ ޤާނޫނާ ޚިލާފަށް ދިރިއުޅޭ ބައެއް ކަމުގައި އެ ޤައުމުގެ ސަރުކާރުން ބަލައެވެ.

ދާދި ފަހުން ޕިނޭންގ ސްޓޭޓްގައި ގިނަ ޢަދަދެއްގެ ރޮހިންޔާ ރެފިއުޖީން ގެދޮރުން ނެރެލި ހާދިސާއާ ގުޅިގެން ކުއާލަލަންޕޫރުގައި ހުންނަ އދގެ ރެފިއުޖީ އޮފީސް ކައިރީ މުޒާހަރާ ބޭއްވިއެވެ. ފުލުހުން ގާތްގަނޑަކަށް 100 މީހުން ހައްޔަރު ކުރި ނަމަވެސް ފަހުން މިނިވަންކުރިއެވެ. މީސްމީޑިއާގައި ރޮހިންޔާ ރެފިއުޖީންނާ ދެކޮޅު ޝުޢޫރު ފެތުރެމުންދާކަން މަސްރަޙު ދިރާސާކުރާ ފަރާތްތަކުން ފާހަގަކުރެއެވެ. އިތުރު ރެފިއުޖީން ރަޖިސްޓަރީ ކޮށްދިނުން މެދުކަނޑައިލުމަށް ވެސް މެލޭޝިޔާ ސަރުކާރުން އދ ގައި އެދިފައިވެއެވެ.

ރޮހިންޔާ ދަރިކޮޅަށް ދަހަރަކަށް ވުރެ ގިނަ ދުވަހު ރައްޔިތުކަން ނިގުޅައިގަނެ އަނިޔާ ކުރެވެމުން އައިސްފައިވާއިރު މިހާރު ދުނިޔޭގައި ވަޒަންވެރިކަމެއް ނެތް އެންމެ ބޮޑު އާބާދީގެ ގޮތުގައި ރޮހިންޔާ ދަރިކޮޅު ހިމެނެއެވެ. 2021 ގައި ވެސް ކޯޓު އަމުރަކާ ޚިލާފަށް ގާތްގަނޑަކަށް 1,000 ރޮހިންޔާ މީހުން ކަނޑުމަގުން މެލޭޝިޔާއިން ފޮނުވާލާފައިވާކަން ފާހަގަކޮށްލެވެއެވެ.