އެމްއެސްއެސް ބޯޓަކުން 17 ހުސް ކޮންޓެއިނަރު ކަނޑަށް ވެއްޓި ސަމާލުވާން އަންގައިފި

މާލެއިން ފުރައިގެން ކޮލަމްބޯއަށް މިސްރާބު ޖެހި މޯލްޑިވްސް ސްޓޭޓް ޝިޕިންގެ އުޅަނދަކުން އިއްޔެ ހެނދުނު 17 ހުސް ކޮންޓެއިނަރު ކަނޑަށް ވެއްޓިއްޖެ އެވެ.

ލަންކާގެ "ޑެއިލީ މިރާ" ނޫހުން ރިޕޯޓުކުރި ގޮތުގައި ކޮލަމްބޯ އިންފޮމޭޝަން ފިއުޝަން ސެންޓަރަށް ލިބުނު މަޢުލޫމާތުން އެނގޭ ގޮތުގައި މި ހާދިސާ މެދުވެރިވީ މޫސުން ގޯސްވެ ކަނޑު ގަދަވުމާ ގުޅިގެންނެވެ.

ކޮންޓެއިނަރުތައް ވެއްޓިފައިވަނީ ކޮލަމްބޯ ބަނދަރާ ހުޅަނގުން ގާތްގަނޑަކަށް 17 ނޯޓިކަލް މޭލު ބޭރަށެވެ. އެ ބޯޓު މާލެއިން ފުރީ މިދިޔަ ހަފުތާގެ އަންގާރަ ދުވަހު އެވެ.

މި ހާދިސާއާ ގުޅިގެން ލަންކާގެ ފިޝަރީޒް އެންޑް އެކުއާޓިކް ރިސޯސަސް ޑިޕާޓްމަންޓުން ވަނީ އެ ސަރަހައްދުން ދަތުރުކުރާ އުޅަނދުފަހަރުން އޮޔާދާ ކޮންޓެއިނަރުތަކަށް ސަމާލުވުމަށް އެދި އެލާޓް ނެރެފަ އެވެ. ކަމާ ގުޅޭ އިދާރާތަކުން ލަފާކުރާ ގޮތުގައި ލަންކާގެ ބެރުވަލާ އާއި ނެގޮމްބޯ ސަރަހައްދުގެ އައްސޭރިފަށަށް އެ ކޮންޓެއިނަރުތައް ލައްގާނެ ކަމުގެ ފުރުސަތު ބޮޑެވެ.

ލަންކާ ނޭވީން އެ ސަރަހައްދު މޮނިޓާ ކުރަމުން ގެންދާއިރު މެރިޓައިމް ރެސްކިއު ކޯޑިނޭޝަން ސެންޓަރުން ވަނީ ކޮންޓެއިނަރެއް ފެނިއްޖެ ނަމަ އެ ސެންޓަރަށް އެންގުމަށް މަސްވެރިންނާއި ދަތުރުވެރިންގެ ކިބައިން އެދިފަ އެވެ. މި ހާދިސާއާ ގުޅޭ ގޮތުން މޯލްޑިވްސް ސްޓޭޓް ޝިޕިންގެ ފަރާތުން އަދި މިހާތަނަށް ވަކި އެއްޗެއް ހާމަކޮށްފައެއް ނުވެ އެވެ.