މިނިވަން ދުވަހުގެ ކުރެހުމާއި ފޮޓޯގްރަފީ މުބާރާތް އަންނަ އަހަރު ފުޅާކުރަނީ

ޤައުމީ ޖިހާދުތަކުގެ ހަނދާންތައް ދެމެހެއްޓުމުގައި ކުރެހުމާއި ފޮޓޯގްރަފީ ފަދަ ފަންނީ ހަރަކާތްތައް މުހިންމު ދައުރެއް އަދާކުރާނެ ކަމަށް ފަންނާއި ސަގާފަތާއި ތަރިކައާބެހޭ ވަޒީރު ހީނާ ވަލީދު ވިދާޅުވެއްޖެއެވެ.

މިނިވަން ދުވަހާ ގުޅިގެން އެ ވުޒާރާއާއި ނޭޝަނަލް ސެންޓަރ ފޯ ދި އާޓްސް ގުޅިގެން ކުރިއަށް ގެންދިޔަ ކުރެހުމާއި ފޮޓޯގްރަފީ މުބާރާތުގެ ނަތީޖާ އިއުލާނުކުރި ޖަލްސާގައި ވާހަކަފުޅު ދައްކަވަމުން ވަޒީރު ފާހަގަކުރެއްވީ މިނިވަން ދުވަހާއި ޤައުމީ ދުވަސް ފަދަ ޚާއްޞަ މުނާސަބަތުތަކާ ގުޅުވައިގެން މި ބާވަތުގެ މުބާރާތް ހިންގުމުގެ ބޭނުމަކީ މިނިވަންކަމުގެ އެ އިހުސާސާއި މާނަ ފޮޓޯއާއި ކުރެހުމުގެ ޒަރީޢާއިން ރައްޔިތުންގެ ހިތްތަކުގައި ދިރުވުން ކަމަށެވެ.

އަދި ކާބަފައިންގެ ޤުރުބާނީތަކާއި ރާއްޖޭގެ ތާރީޚާއި ސަޤާފީ ތަރިކަ ހަނދާނުގައި ބެހެއްޓުމަށް މިއީ ނުހަނު ބޭނުންތެރި މަސައްކަތެއް ކަމަށް ވެސް ވިދާޅުވިއެވެ.

މި މުބާރާތަށް ރައްޔިތުންގެ ފަރާތުން ބޮޑު ތަރުހީބެއް ލިބިފައިވާކަން ފާހަގަކުރައްވައި ވަޒީރު ވިދާޅުވީ "160 އަށް ވުރެ ގިނަ ހުށަހެޅުން ލިބިފައިވޭ. މިކަމުން އަނގައިދިނީ ހުރިހާ ފަރާއްތަކުން މިފަދަ ކަންކަަމަށް އޮތް ޝައުގުވެރިކަން. ކުރެހުމާއި ފޮޓޯ ނެގުމުގެ މިފަދަ މުބާރާތްކަކީ މި ފަދަ މުނާސަބަތުތަކާއި ގުޅިގެން ކުރިއަށް ގެންދިޔުމަަށް ވަރަށް މުހިންމު މުބާރާތްތަކެއް. މި އަންނަ އަހަރުގެ މިނިވަން ދުވަހާއި ދިމާކޮށް ރަނގަޅު އިނާމުތަކާއެކު މިއަށްވުރެއް ފުޅާ ދާއިރާއެއްގައި މި މުބާރާތް ބޭއްވިގެންދާނެ" ކަމަށެވެ.

އެގޮތުން އަންނަ އަހަރުގެ މިނިވަން ދުވަހާ ދިމާކޮށް ރަނގަޅު އިނާމުތަކާ އެކީ މި މުބާރާތް މިހާރަށް ވުރެ ފުޅާ ދާއިރާއެއްގައި ކުރިއަށް ގެންދިއުމަށް ވުޒާރާއިން ދަނީ ރާވަމުންނެވެ.